இப்படியும் பயணம்.............!

இன்று மாலை 5.30 மணி இருக்கும்...! எனது கல்வி செயற்பாட்டை முடித்து நெல்லியடியில் அமைந்திருக்கும் esoft கணனி நிறுவனத்தில் இருந்து வீடு திரும்புவதற்காக நெல்லியடி பஸ் நிலையத்தில் என் நண்பருடன் (தன்சயன்) நின்றிருந்தேன். சுமார் 15 நிமிடத்தின் பின் இலங்கை போக்குவரத்து சபைக்கு சொந்தமான பஸ் ஒன்று பருத்தித்துறையில் இருந்து யாழ்ப்பாணம் நோக்கி செல்வதற்காக (750 சாலை இலக்கம் கொண்ட பஸ்) வந்து நின்றது. நானும் என் நண்பரும் பஸ்ஸில் ஏறி ஆசனத்தில் உட்கார்ந்து கொண்டோம்..அந்த நேரம் பஸ் நடத்துனர் பயணச்சீட்டு எடுப்பதற்காக எம்மிடம் வந்தார்..என் நண்பர் அச்சுவேலியில் இறங்க இருந்ததால் “ஒரு அச்சுவேலி ஒரு ஆவரங்கால்” என கூறி ரூபா 40 ஐ அவரிடம் நீட்டினேன் இரண்டு 20 ரூபாய் நோட்டுகளாக..

அவரும்

நெல்லியடி – அச்சுவேலி 18.00

நெல்லியடி – ஆவரங்கால் 20.00

        என்று பயணச்சீட்டு எழுதி எம்மிடம் தந்து விட்டு சென்று விட்டார்..(மீதி 02 ரூபாய் நாம் வழக்கமாய் கேட்பதில்லை..கேட்டால் கிடைப்பதுமில்லை..)

சரி என்று பயணத்தை ஆரம்பித்த நாம் இமையாணன்,வல்வை என்னும் இடங்களை கடந்து அச்சுவேலியை வந்தடைந்தோம்.. அங்கு என் நண்பர் இறங்கி விட நான் தனித்து பயணத்தை தொடர்ந்தேன்..

இந் நிலையில் ஆவரங்கால் சந்தி என்ற இடத்தில் இ.போ.ச பயணச்சீட்டு பரிசோதகர்கள் பஸ்ஸில் ஏறினர்..வழக்கம் போல் பயணச்சீட்டை பரிசோதித்து கொண்டு வந்த அவர்களில் ஒருவர் என்னிடம் வந்து பயணச்சீட்டை வாங்கிப் பார்த்தார்..

பார்த்தவர் என்னிடம் கேட்டது.. “எங்க போறீங்க..??”

நான் “ஆவரங்கால்”

அவர் “ஆவரங்கால் எவடம்”

நான் “ஆவரங்கால் யுனியனடி(Union)”

அவர் “யுனியனடி???அப்படி எண்டா 06 ரூபாய்க்கு டிக்கட் எடு” என்றார்.

ஆசனத்தில் இருந்து சடுதியாக எழுந்த நான் “ஏன்?” என்று கேட்டேன்..

அவர் சொன்னார் “ஆவரங்கால் யுனியன் புத்துாரில் இருக்கு..அதால எடுக்கணும்” என்றார்..

நான் “இவடம்  எப்ப புத்துார் ஆனது..??” என்றேன் மறுபடியும்..

ஆடிப்போன அவர் மௌனமானார்...

நான் தொடர்ந்தேன்..

“நான் பிறந்து வளர்ந்தது இங்க…எனக்கு தெரியாம எப்படி??? எண்ட N.I.C ல கூட ஆவரங்கால் எண்டே இருக்கு...அப்படி இருக்க எப்படி இது புத்துார் ஆனது...??” என்று கேள்வி எழுப்பினேன்..

தடுமாறிப்போன அவர் சமாளிக்க முற்பட்டார்…

 இவ்விடத்தில் நீங்கள் அறிய வேண்டிய விடயம்..

ஆவரங்கால் புத்துார் எல்லை நான் இறங்க வேண்டிய இடத்தில் இருந்து 100m தொலைவில் உள்ளது..

நான் பாடசாலை காலத்தில் பயணிக்கும் போது மாதாந்த பருவச்சீட்டில் ஆவரங்கால் என்றே பதியப்பட்டிருந்தது..

பாடசாலை காலத்தின் பின் தற்போது யாழ்ப்பாணம் செல்வதற்காக அதே யுனியனின் முன் உள்ள பஸ் தரிப்பிடத்தில் இருந்து பஸ்ஸில் புறப்படும் போது பஸ் நடத்துனர் ஆவ – யாழ்(ஆவரங்கால் – யாழ்ப்பாணம்) என்றே எழுதி 35 ரூபாய்க்கு பயணச்சீட்டு தருவார்..பணமும் பெற்று கொள்வார்..!

இப்படியாக இவ்விடத்தில் இருந்து யாழ்ப்பாணம் செல்லும் போது இவ்விடம் ஆவரங்கால் ஆக இருக்க (அதுவே உண்மை) நெல்லியடியில் இருந்து இங்கு வர மட்டும் இவ்விடம் புத்துாராக மாறுவது எப்படி....??? என்பது குழப்பத்துக்குரிய கேள்வியாகும்.

      சரி இனி விடயத்துக்கு வருவோம்..

அவரோ 06 ரூபாய்க்கு டிக்கட் எடுக்கும் படி கூறவும் நான் அதை மறுப்பதுமாக இருக்க நான் இறங்க வேண்டிய இடம் வந்து சேர்ந்தது..

பஸ் சாரதியை நான் கேட்டு கொண்டதை அடுத்து பஸ் அவ்விடத்தில் நிறுத்தப்பட்டது..

எனினும் வாக்குவாதம் தொடர்ந்தது..

இந்நிலையில் சட்டென்று வீதியில் இருந்த கடையொன்றின் பெயர்பலகை என் கண்ணில் தட்டுப்பட்டது...அதை அவர்களிடம் காண்பிக்க பஸ்ஸில் அவர்களை நோக்கிய ஏளனச்சிரிப்பு உதிர்ந்தது... வெட்கிப்போன அவர்கள் “சரி சரி தம்பி இதோட இத விடப்பா...”என்று கூற நானும் பஸ்ஸில் இருந்து இறங்கினேன். அப்போது சாரதி என்னை பார்த்து “இதாண்டா சரி” என்ற  பொருளில் புன்னகைக்க பெருமிதம் என்னுள்....

      இப்படி உண்மை இருக்க ஏன் இந்த நடத்துனர்கள்,பரிசோதகர்கள் இப்படி நடந்து கொள்கின்றனர்...?

இப்படியான செயற்பாடுகள் நாடு முழுவதும் நடந்து கொண்டு இருக்கின்றது..இதை தடுக்க நாம் நம் பிரதேசத்தின் எல்லை,பரப்பு,வீதி அமைப்பு போன்ற விடயங்களை முறையாகவும் தெளிவாகவும் தெரிந்து வைத்திருக்க வேண்டும்.

பதிவில் ஓர் குறள்

பொருட்பால் - அரசியல் - இறைமாட்சி

குறள் 385:

இயற்றலும் ஈட்டலுங் காத்தலும் காத்த 
வகுத்தலும் வல்ல தரசு.

கலைஞர் உரை:

முறையாக நிதி ஆதாரங்களை வகுத்து, அரசாங்கக் கருவூலத்திற்கான வருவாயைப் பெருக்கி, அதைப் பாதுக்காத்துத் திட்டமிட்டுச் செலவிடுவதுதான் திறமையான நல்லாட்சிக்கு இலக்கணமாகும்.

மு.வ உரை:

பொருள் வரும் வழிகளை மேன்மேலும் இயற்றலும் வந்த பொருள்களைச் சேர்த்தலும், காத்தலும் காத்தவற்றை வகுத்துச் செலவு செய்தலும் வல்லவன் அரசன்.

Translation:

A king is he who treasure gains, stores up, defends, 
And duly for his kingdom's weal expends.

Explanation:

He is a king who is able to acquire (wealth), to lay it up, to guard, and to distribute it.

Continue reading →

உதட்டில் ஓர் காயம்...

ஒரு ஜனாதிபதி விளையாட்டை விளையாட்டாக விளையாட போய் அது வினையாக மாறிய சம்பவம் இன்று(அங்கு 26-11-2010 வெள்ளி காலை) நடந்தேறியது...

அமெரிக்க அதிபர் இல்லம்,வெள்ளை மாளிகை மைதானத்தில் தன் உறவினருடன் விளையாட போன அதிபர் பாரக் ஒபாமாவே வினையை வாங்கி வந்துள்ளார்.(பழகிய தோசமோ?)

ஒபாமா எப்படி ஒரு சிறந்த அரசியல்வாதியோ அவ்வளவு விளையாட்டிலும் திறமையானவர்...காலையில் தன் உறவுகள்,நண்பர்களுடன் மைதானத்தில் கூடைப்பந்தாட்டம் விளையாடிக் கொண்டிருந்தார். தன் அரசியல் அழுத்தங்களை மறந்து நிம்மதியாக “நன்றி பகிர்தல்” தினத்தை முன்னிட்டு (நமக்கெல்லாம் இது சரிப்பட்டு வராது) Duke University கூடைப்பந்து வீரர்களுடன் விளையாட்டில் கலக்கி கொண்டிருந்த போது, பந்தை பறிக்க வந்த பல்கலைககழக வீரரின் கை அவரின் உதட்டை பதம் பார்த்தது..வேகமாக பந்துடன் முன்னேறிய ஒபாமாவை தடுத்து எப்படியாவது பதவியை சீ பந்தை  பறித்து விட வேண்டும் என்ற ஆவேசத்துடன் அவர் மீது பாய்ந்த வீரரின் கை பந்தை தொடமுன் முழங்கை உதட்டை தொட்டது..இல்லை இல்லை தாக்கியது என்பதே பொருத்தம்.

அடிபட்டது தான் தாமதம் உதடு உடைந்து விட்டது. ரத்தம் பீறிட்டது. வலியால் துடித்த ஓபாமா ஓலமிட்டார்...இதற்கிடையில் எப்படியும் இடித்தவனை திட்டியிருப்பார்(எப்படி நம்மவர்கள் போல் “பரதேசி பன்னாடை” “கண்ணில்லா கபோதி” என்று திட்டி இருப்பாரோ..!)

வலியால் அவதிப்பட்ட ஒபாவை அலுவலர்கள் உடனடியாக வைத்தியசாலையில் அனுமதித்தனர்.அங்கு அவரை பரிசோதித்த வெள்ளை மாளிகை வைத்தியர்கள் அவர் உதட்டில் தையல்(stitches)போட நேரிட்டது. ஒன்றல்ல  இரண்டல்ல பன்னிரண்டு தையல்கள்....!(சின்னன் சின்னனா நிறைய போட்டிருப்பாங்களோ...?)

இந் நிலையில்,வெள்ளை மாளிகை பேச்சாளர் Robert Gibbs இது பற்றி தெரிவிக்கையில், "After being inadvertently hit with an opposing player's elbow in the lip ... the president received 12 stitches today, administered by the White House Medical Unit," என்றார்.

                        சிகிச்சையின் பின் ஒபாமா

இக் காயம் ஆற எப்படியும் இரண்டு வாரங்கள் தேவைப்படும் நிலையில் ஆட்சி விவகாரங்கள் பற்றி எப்படி விவாதிக்க போகிறார்? இவரின் அர்த்தமுள்ள உரையை (சிரிக்காதீங்கப்பா....சீரியஸா சொல்லுறேன்) கேட்காமல் அமெரிக்க அமைச்சரவை எப்படி இருக்க போகிறதோ??

இந்த இடைவெளியில் ஈரான்,வட கொரியா நாடுகள் ஏதும் பேசாமல் இருந்தால் சரி....மாறாக பேசினால் நம்மவர்கள் சொல்வது போல் “இனி வாய் பேசாது கை தான் பேசும்” என்று நடக்குமோ அல்லது “தானாடா விட்டாலும் தசை ஆடும்” என்பது நடக்குமோ...பார்ப்போம்...

ஆனால் இந்த சம்பவம் எக்காரணத்தை கொண்டும் ஆட்சி விசயங்களை பாதிக்காது..ஏனெனில் அங்குதான் ஜனாதிபதிக்கு உதவுவதற்கென 10 பேர் கொண்ட இலாகா/அமைச்சு இருக்கின்றதே..பிறகென்ன கவலை....

பதிவில் ஓர் குறள்

குறள் 384:

அறனிழுக்கா தல்லவை நீக்கி மறனிழுக்கா 
மானம் உடைய தரசு.

கலைஞர் உரை:

அறநெறி தவறாமலும், குற்றமேதும் இழைக்காமலும், வீரத்துடனும், மானத்துடனும் ஆட்சி  நடத்துபவர்களே சிறந்தவர்களாவார்கள்.

மு.வ உரை:

ஆட்சி முறைக்கு உரிய அறத்தில் தவறாமல் அறமல்லாதவற்றை நீக்கி வீரத்தில் குறைபடாத மானத்தை உடையவனே சிறந்த அரசன் ஆவான்.

Translation:

Kingship, in virtue failing not, all vice restrains,
In courage failing not, it honour's grace maintains.

Explanation:

He is a king who, with manly modesty, swerves not from virtue, and refrains from vice.

Continue reading →

என் பெயர் ஓஸிமாண்டியாஸ் (Ozymandias)

        அண்மையில் இணையத்தில் நான் படித்து ரசித்த கவிதை ஒன்று இது.

இன்றைய நடைமுறை நிலையை நான் அதில் பார்த்து அதிர்ந்து விட்டேன்..அன்று முதல் இதுதான் நிலை என்று எனக்கு அது தெளிவாக புலப்படுத்தியது. நான் அனுபவித்தது இதோ உங்களுடன்.....

I met a traveller from an antique land
who said: Two vast and trunkless legs of stone
stand in the desert. Near them, on the sand,
Half sunk, a shattered visage lies, whose frown
And wrinkled lip, and sneer of cold command
Tell that its sculptor well those passions read
Which yet survive, stamped on these lifeless things,
The hand that mocked them and the heart that fed.
And on the pedestal these words appear:
"My name is Ozymandias, king of kings:
Look on my works, ye Mighty, and despair!"
Nothing beside remains. Round the decay
Of that colossal wreck, boundless and bare
The lone and level sands stretch far away.

தமிழாக்கம்

பழந்தேசத்து பயணி ஒருவரை சந்திக்க நேர்ந்தது
அவர் சொன்னார்:
பாலைவனத்தில் உடலற்ற இரு பெரும் கால்கள் நிற்கின்றன
அருகில் மணலில் சிதைந்த முகமொன்றைக் கண்டேன்
சுருங்கிய இதழ்களில் என்னவொரு அலட்சியமான கம்பீரம்!
வடித்த சிற்பி திறமைசாலி தான்
உயிரற்ற கல்லில் உணர்ச்சிகளை உயிர்ப்பித்திருக்கிறான்.
கால்கள் நின்ற பீடத்திலே எழுதியிருந்தது:

”என் பெயர் ஓஸிமாண்டியாஸ்
அரசர்களுக்கெல்லாம் அரசன்
நான் படைத்தவற்றைப் பார், ஆற்றாமை கொள்”

கால்களையும், உடைந்த முகத்தையும் தவிர
சுற்றி வேறொன்றும் இல்லை..
தொடுவானம் வரை அழிவும் மணலும் தான் தெரிந்தன.

இங்கே சொடுகி இக்கவிதையின் ஒலி வடிவை செவிமடுங்கள்...

http://www.bbc.co.uk/arts/romantics/poems4.shtml

இந்த நிதர்சன கவிதை  200 ஆண்டுகளுக்கு முன் 1818ல் சோனட் வகை கவிதையாக பெர்சி பைஷ் ஷெல்லி (Percy Bysshe Shelley) அவர்களால் எழுதப்பட்டது.

இதில் குறிப்பிடப்படும் “ஓஸிமாண்டியாஸ்” என்ற வார்த்தை

பண்டைய எகிப்த்து பேரரசர்களுள் ஒருவரான இரண்டாம் ராமசேசை குறிக்கின்றது.

இரண்டாம் ராமசேசின் ஆட்சிப் பெயரான  User-maat-re Setep-en-re என்பதின் கிரேக்க மொழிபெயர்ப்பே ஓஸிமாண்டியாஸ்.இவரின் ஆட்சி காலத்தில் எகிப்தில் பல உன்னத கட்டிடங்கள் எழுந்தன...அவற்றில் ஒன்றின் பீடத்தில்,

நான், ஓஸிமாண்டியாஸ்..அரசர்களுக்கேல்லாம் அரசன். என் பெருமைகளை உணர வேண்டுமெனில் நான் படைத்தவற்றுள் ஏதேனும் ஒன்றை பார்.

King of Kings am I, Osymandias. If anyone would know how great I am and where I lie, let him surpass one of my works.

       என இருந்தது என கூறப்படுகிறது. இந்த புகழ் பெற்ற கவிதை ஜனவரி 11, 1818ல் த எக்சாமினர் என்ற இதழில் வெளியானது.

என்ன சைலன்ட் ஆகிட்டீங்க....?

நீங்களும் அனுபவித்தீர்களா..? உங்கள் அனுபவங்களை என்னோடு பகிருங்கள்....

பதிவில் ஓர் குறள்

பொருட்பால் - அரசியல் - இறைமாட்சி

குறள் 383:

தூங்காமை கல்வி துணிவுடைமை இம்மூன்றும் 
நீங்கா நிலனான் பவர்க்கு.

கலைஞர் உரை:

காலம் தாழ்த்தாத விரைவான நடவடிக்கைகளும், அறிவுடைமையும், துணிவும்

நாடாளுகின்றவர்களுக்குத் தேவையானவையும், நீங்காமல் நிலைத்திருக்க   வேண்டியவையுமான பண்புகளாகும்.

மு.வ உரை:

காலம் தாழ்த்தாத தன்மை, கல்வியுடைமை, துணிவுடைமை இந்த மூன்று பண்புகளும் நிலத்தை ஆளும் அரசனுக்கு நீங்காமல் இருக்க வேண்டியவை.

Translation:

A sleepless promptitude, knowledge, decision strong: 
These tree for aye to rulers of the land belong.

Explanation:

These three things, viz., vigilance, learning, and bravery, should never be wanting in the ruler of a country

Continue reading →